ალტე უნივერსიტეტის საერთაშორისო ურთიერთობების დეპარტამენტის მიზანია გლობალური სტანდარტების დანერგვა და განვითარება უნივერსიტეტის სწავლა-სწავლებისა და ადმინისტრირების პროცესში. საერთაშორისო ურთიერთობების დეპარტამენტის პრიორიტეტია: საერთაშორისო ინსტიტუტებთან თანამშრომლობა, სტუდენტებისა და პერსონალის გაცვლით პროექტებში მონაწილეობის ზრდის ხელშეწყობა, საერთაშორისო ქსელებში უნივერსიტეტის ჩართვა, ერთობლივი პროგრამების ხელშეწყობა, საერთაშორისო სტუდენტებისა და პერსონალის მხარდაჭერა.
ალტე უნივერსიტეტი მჭიდროდ თანამშრომლობს სხვადასხვა საერთაშორისო ორგანიზაციასთან და უცხოურ უნივერსიტეტებთან, როგორც საგანმანათლებლო პროგრამების განვითარების, ისე კვლევის განხორციელების მიმართულებით. ალტე უნივერსიტეტი ასევე მასპინძლობს საერთაშორისო პროექტების ადგილობრივ წარმომადგენლობებს და ხელს უწყობს ქართველი მოსწავლეებისა და სტუდენტების მონაწილეობას გლობალურ შეჯიბრებებში. უცხოურ უნივერსიტეტებთან და ინსტიტუტებთან თანამშრომლობა ჩვენს სტუდენტებსა და პერსონალს შესაძლებლობას აძლევს, მონაწილეობა მიიღონ გაცვლით პროექტებში, საზაფხულო და ზამთრის სკოლებში, საერთაშორისო პროექტებსა და კვლევებში.
საერთაშორისო ქსელების წევრობა:
EUA - ალტე უნივერსიტეტი ევროპის უნივერსიტეტების ასოციაციის (EUA) წევრია.
ასოციაცია ევროპის უნივერსიტეტებსა და განათლების სფეროში არსებულ ორგანიზაციებს აერთიანებს და მას 47 ქვეყანაში 850 -მდე წევრი ჰყავს. ორგანიზაცია ბრიუსელშია დაფუძნებული და უზრუნველყოფს ევროპის უმაღლესი განათლების პოლიტიკისა და პრაქტიკის შესწავლას ხარისხის უზრუნველყოფის, ინტერნაციონალიზაციის, მმართველობისა და დაფინანსების კუთხით, ასევე ახორციელებს ტრანსნაციონალური და ინსტიტუციური განვითარების პროექტებს.
ასოციაცია თანამშრომლობს ევროკომისიასა და ევროპარლამენტთან და წევრ ორგანიზაციებს შესაძლებელობას აძლევს, მონაწილეობა მიიღონ ევროკავშირის უმაღლესი განათლების სამომავლო პოლიტიკისა და ინიციატივების ფორმირებაში.
ალტე უნივერსიტეტს, როგორც ევროპის უნივერსიტეტების ასოციაციის წევრს, შესაძლებლობა ექნება, ჩაერთოს საერთაშორისო საგანმანათლებლო აქტივობებსა და ერთიან ევროპულ პროექტებში, მიიღოს მონაწილეობა ევროპული საგანმანათლებლო პოლიტიკის შემუშავების პროცესში და გაიზიაროს საუკეთესო პრაქტიკის შესახებ გამოცდილება.
EAIE - ალტე უნივერსიტეტი EAIE-ის (ევროპის უმაღლესი განათლების საერთაშორისო ასოციაციის) წევრია.
EAIE, რომელიც 1989 წელს დაარსდა, არის უმაღლესი განათლების საერთაშორისო გაცვლის სფეროში ყველაზე მნიშვნელოვანი ევროპული ცენტრი. ის აერთიანებს პროფესიონალებს და უზრუნველყოფს საერთაშორისო განათლების ქსელებს, რესურსებსა და ექსპერტიზას. ალტე უნივერსიტეტის გაწევრიანება ამ ორგანიზაციაში კიდევ უფრო გააძლიერებს ჩვენს საერთაშორისო კავშირებს და გააფართოებს საგანმანათლებლო შესაძლებლობებს როგორც სტუდენტებისთვის, ასევე აკადემიური პერსონალისთვის.
- ARISA - ალტე უნივერსიტეტი პროექტის, ARISA (Artificial Intelligence Skills Alliance), ასოცირებული პარტნიორია.
ARISA erasmus + - ის ოთხწლიანი ტრანსნაციონალური პროექტია და იგი მიზნად ისახავს ხელოვნური ინტელექტის უნარებისთვის სტანდარტების შემუშავებასა და დანერგვას ევროპაში, რაც ხელს შეუწყობს სანდო და ეთიკური ხელოვნური ინტელექტის აპლიკაციების შექმნასა და განვითარებას.
ARISA აერთიანებს წამყვან ევროპულ უნივერსიტეტებს, მაღალტექნოლოგიურ კომპანიებსა და ტექნოლოგიურ ასოციაციებს.
პროექტ ARISA -სთან თანამშრომლობა ალტე უნივერსიტეტის პროფესორებს შესაძლებლობას აძლევს, ჩაერთონ ხელოვნური ინტელექტის მიმართულებით მომუშავე სხვადასხვა ჯგუფებში და ევროპელ კოლეგებთან ერთად მონაწილეობა მიიღონ სამუშაო შეხვედრებში, რომელთა შედეგადაც ყალიბდება ევროპული საგანმანათლებლო სივრცის პოლიტიკა AI -სთან მიმართებით.
ADEE - ალტე უნივერსიტეტი სტომატოლოგიური განათლების ასოციაციის - ADEE ინსტიტუციური წევრია. ADEE სტომატოლოგიურ სფეროში არსებული ყველაზე გავლენიანი ორგანიზაციაა, რომელიც ევროპის მასშტაბით, დიპლომამდე და დიპლომის შემდგომ განათლებას არეგულირებს.
იგი აერთიანებს მოწინავე სამედიცინო სასწავლებლებს, სპეციალიზებულ საზოგადოებებს და პროფესიულ ასოციაციებს.
ADEE-ს წევრობა ალტე უნივერსიტეტის სტომატოლოგიის პროგრამის სტუდენტებსა და აკადემიურ პერსონალს შესაძლებლობას აძლევს მონაწილეობა მიიღონ:
• ორგანიზაციის ყოველწლიურ შეხვედრებსა და ღონისძიებებში;
• პან-ევროპული სტომატოლოგიური განათლების სფეროს აქტივობებში;
• ორგანიზაციის სპეციალური პროფესიული ჯგუფების თეორიულ და პრაქტიკულ აქტივობებში;
• აღმასრულებელი კომიტეტისა და სხვა ექსპერტთა პანელების მუშაობასა და გადაწყვეტილებების მიღებაში;
აგრეთვე, სტუდენტებსა და აკადემიურ პერსონალს, სრული წვდომა აქვთ ევროპის სტომატოლოგიური განათლების ჟურნალზე და მნიშვნელოვანი ფასდაკლებით სარგებლობენ ევროპული ასოციაციის მიერ ორგანიზებულ სტომატოლოგიურ კონფერენციებსა და დარგობრივ აქტივობებზე.
ADEE-ს მიზანია, სტომატოლოგიური განათლების ხარისხის ზრდა და ხალხისთვის ჯანდაცვის უმაღლესი სტანდარტის შექმნა.
- AMEE - ალტე უნივერსიტეტი ევროპის სამედიცინო განათლების ასოციაციის (AMEE) წევრია, იგი აერთიანებს 90-ზე მეტი ქვეყნის უმაღლესი საგანმანათლებლო დაწესებულების სტუდენტებს, აკადემიურ პერსონალს, მკვლევარებსა და მეცნიერებს. იგი ქმნის ერთიან პლატფორმას, რომელიც საშუალებას აძლევს თითოეულ დაინტერესებულ პირს, მიიღოს სასურველი ინფორმაცია მედიცინისა და ჯანდაცვის სფეროს თაობაზე, ასევე, მათ აქვთ შესაძლებლობა დაგეგმონ და განახორციელონ ერთობლივი პროექტები და მონაწილეობა მიიღონ საერთაშორისო კონფერენციებსა თუ ღონისძიებებში.
- ალტე უნივერსიტეტი ჩართულია Erasmus + პროგრამაში, რაც შესაძლებლობას აძლევს სტუდენტებსა და პერსონალს, ისარგებლონ გაცვლითი პროგრამებით ევროპის უნივერსიტეტებში. გარდა ამისა, ურთიერთთანამშრომლობის ფარგლებში, გაცვლითი პროგრამები მოქმედებს ამერიკისა და აზიის ქვეყნების უნივერსიტეტებთანაც. კვლევით ცენტრებთან თანამშრომლობა ხელს უწყობს აკადემიურ პერსონალს, ჩაერთონ სხვადასხვა კვლევით პროექტში.
ალტე უნივერსიტეტთან თანამშრომლობის სურვილის შემთხვევაში, მიმართეთ საერთაშორისო ურთიერთობების ოფისს: international@alte.edu.ge